अण्डा भित्र लुकाएर लागु औषध ल्याउने २ जना पक्राऊ

४ फाल्गुण २०७९/झापा
भारतबाट अण्डा भित्र हालेर ल्याउँदै गरेको लागु औषध सहित विहीबार काँकडभिट्टामा २ जना पक्राउ परेका छन् । पक्राउ पर्नेमा अर्जुनधारा नगरपालिका वडा नं. ३ का २४ बर्षीय एतराज इवा र २७ बर्षीय प्रकाश खाती रहेका छन् । उनीहरुको साथबाट क्यारेटमा ल्याएको अण्डा भित्र सानो प्वाल पारी ५ ग्राम लागु औषध राखेको अवस्था पक्राउ गरिएको जिल्ला प्रहरी कार्यालय झापाका सूचना अधिकारी खगेन्द्रप्रसाद रिजालले जानकारी दिनु भयो ।

पक्राउ गरिएकालाई इलाका प्रहरी कार्यालय काँकडभिट्टामा राखी थप अनुसन्धान भइरहेको बताइएको छ । झापामा पछिल्लो समय लागु औषध कारोवार बृद्धि हुँदै गएको छ । गएको आर्थिक बर्षमा लागु औषध सम्बन्धी जिल्ला अदालत झापामा २ सय वटा मुद्धा परेका छन् भने ३ सय ७ जना प्रक्राउ परेको जिल्ला प्रहरी कार्यालय झापाले जानकारी दिएको छ ।