नक्कली शैक्षिक प्रमाणपत्रविरुद्ध ‘फोक्सट्रोट चार्ली’ अभियान जारीः थप ७ जना पक्राउ
२ भदाै २०८०,काठमाडौँ– नक्कली प्रमाण पत्रकाे विषय लिएर सांसद शुनिल शर्मालाई पक्राउ गरे पछि चर्चामा अाएकाे सरकारले थप ७ जनालाई पक्राउ गरेकाे छ । नेपाल प्रहरीले एमबीबीएस कोर्ष अध्ययन गर्न जाने प्रयोजनका लागि शैक्षिक प्रमाणपत्र नक्कली बनाएको आरोपमा ७ जनालाई पक्राउ गरेको हाे । प्रहरीको केन्द्रीय अनुसन्धान ब्यूरोले नक्कली शैक्षिक प्रमाणपत्रविरुद्ध सञ्चालन गरेको ‘अप्रेसन’मा एमबीबीएस अध्ययन गर्न जाने प्रयोजनका लागि आफ्नो शैक्षिक योग्यताको प्रमाणपत्र नक्कली बनाएकाले सातजनालाई पक्राउ गरी शुक्रबार राति सार्वजनिक गरेको हो ।
पक्राउ पर्नेमा अनु फार्मेसी विराटनगरमा कार्यरत मोरङका ३४ वर्षीय मनित चौधरी, त्रिभुवन विश्वविद्यालय शिक्षण अस्पताल महाराजगञ्जमा कार्यरत बाराका ३४ वर्षीय अमित चौधरी, एमडी अध्ययनको तयारी गरेकी काठमाडौँकी २९ वर्षीया एरिना शाह, इसान बाल अस्पताल वसुन्धरामा कार्यरत ललितपुरकी ३३ वर्षीया श्रद्धा शिल्पकार, काठमाडौँका २८ वर्षीया पुनम थापा, बागमती अस्पताल रौतहटमा कार्यरत सिरहाका ३२ वर्षीय रामबाबु यादव र चितवन मेडिकल कलेजमा अध्ययनरत सप्तरीका २८ वर्षीय नसिम अख्तर रहेका छन् ।
ब्यूरोका प्रवक्ता एवं प्रहरी उपरीक्षक सञ्जयसिंह थापाले शैक्षिक योग्यतामा अङ्क वास्तविकभन्दा थपघट गरी काम गरिरहेको र पढिरहेकाले पक्राउ गरिएको जानकारी दिनुभयो ।
प्रहरीले राष्ट्रिय परीक्षा बोर्ड, परीक्षा नियन्त्रण कार्यालय, सानोठिमी, भक्तपुरलाई पत्राचार गरी यकिन गरी नक्कली भएको आधारमा पक्राउ गरी अनुसन्धान गरेको हो । पक्राउ परेका सातैजनालाई काठमाडौँ जिल्ला अदालतबाट पाँच दिनको म्याद थप गरी अनुसन्धान भइरहेको प्रवक्ता थापाले बताउनुभयो ।
‘फोक्सट्रोट चार्ली’ नाम दिएर नेपाल प्रहरीको अनुसन्धान ब्यूरो सीआइबीले थालेको अप्रेशनको पहिलाे दिन नै कांग्रेस सांसद डक्टर शुनिल शर्मा सहित पाँच जनालाई पक्राउ गरेकाे थियाे । शर्मालाई पक्राउ गरे पछि सरकारकाे निक्कै अालाेचना समेत भयाे । अपरेशन थालेकाे पहिलाे चरणमा डा. अमित चौधरी, डा.रामबाबु यादव, डा.एरिना शाह, मोरङका मनिष चौधरी डा. श्रद्धा शिल्पकार, रञ्जितकुमार यादव र पुनम थापा पक्राउ परेका थिए ।
