नेपालमा आज १२३९ संक्रमित, १३२४ निकाेः १३ जनाकाे मृत्यु

७ अशाेज २०७८,काठमाडौँ — पछिल्लो २४ घण्टामा नेपालमा १ हजार २ सय ३९ जनामा कोरोना भाइरस संक्रमण देखिएको छ । स्वास्थ्य मन्त्रालयका अनुसार ११ हजार ६२९ पीसीआर परीक्षणमा बिहीबार थप ९ सय ४१ जनामा संक्रमण पुष्टि भएको छ भने एन्टिजेन विधिद्वारा गरिएको ३ हजार ६ सय २४ परीक्षणबाट २ सय ९८ जनामा पोजिटिभ देखिएको छ । २४ घण्टामा पीसीआर र एन्टिजेन विधिबाट गरिएको १५ हजार २ सय ४३ परीक्षणमा १ हजार २ सय ३९ जनामा संक्रमण पुष्टि भएको मन्त्रालयले जनाएको हाे ।

पछिल्लो २४ घण्टामा थप १ हजार ३ सय २४ जना संक्रमणमुक्त भएका छन् । हालसम्म निको हुनेको संख्या ७ लाख ५६ हजार ९५४ रहेको छ । नेपालमा कोरोना संक्रमणबाट थप १३ जनाको मृत्यु भएको छ । हालसम्म कोरोनाबाट मृत्यु हुनेको संख्या ११ हजार ७२ पुगेको छ । हालसम्म देशभर ४१ लाख ३६ हजार २०८ नमुनाको पीसीआर परीक्षण भएको छ । क्वारेन्टाइनमा २४६ जना रहेका छन् भने आइसोलेसनमा रहनेको संख्या २० हजार ७४३ रहेको छ ।