आज २५०३ जनाले जिते काेराेना, १९४६ संक्रमित थपिए
२९ कार्तिक २०७७, काठमाडौं– नेपालमा कोरोना भाइरस (कोभिड १९) बाट २४ घण्टामा २ हजार ५ सय ३ जना डिस्चार्ज भएका छन् । यसैगरी थप १ हजार ९ सय ४६ जना संक्रमित भएका छन् ।
स्वास्थ्य तथा जनसंख्या मन्त्रालयका अनुसार बितेको २४ घण्टामा देशभरका प्रयोगशालामा ८ हजार ७ सय ५३ जनाको गरिएको पीसीआर परीक्षणमा १ हजार ९ सय ४६ संक्रमित भएका हुन् । नेपालमा हालसम्म संक्रमित हुनेको संख्या २ लाख ८ हजार २ सय ९९ रहेको छ ।
नेपालमा आजसम्म पीसीआर परीक्षण गर्नेको संख्या १६ लाख २ हजार ६ सय ३ रहेको छ । अहिले ३६ हजार ४ सय ५२ जना आइसोलेसनमा छन् भने एक हजार ५७ जना क्वारेन्टाइनमा बसेका छन् ।
मन्त्रालयका अनुसार अहिलेसम्म डिस्चार्ज हुनेको संख्या १ लाख ७० हजार ६ सय ३२ रहेको छ । नेपालमा निको हुनेको दर ८१.९ प्रतिशत रहेको छ ।
कोरोनाबाट थप १३ जनाको मृत्यु
देशभर पछिल्लो २४ घण्टामा १३ जनाको कोरोना संक्रमणबाट मृत्यु भएको छ । स्वास्थ्य तथा जनसंख्या मन्त्रालयका अनुसार नेपालमा कोरोना भाइरसबाट मृत्यु हुनेको संख्या १ हजार २ सय १५ पुगेको छ । नेपालमा संक्रमित हुनेहरुमध्ये ०.६ प्रतिशतको ज्यान गएको छ ।
