स्वदेश फिर्ती हुन चाहानेको समस्या सुनवाई नभएको शरणार्थीको गुनासो
२६ कार्तिक २०८२/डिकेश लामा
युरोपेली संघकी नेपालका लागि राजदुत भेरोनिक लोरेन्जो सहितको टोलीले आज पूर्वी नेपालमा बसोवास गर्ने भूटानी शरणार्थीको अवस्था र समस्याबारे जानकारी लिएका छन् । झापाको वेलडाँगी र मोरङको पथरी शनिश्चरे शिविरमा पुगेर शरणार्थी शिविरमा बाँकी रहेका शरणार्थीको समस्या र समाधानको विषयमा छलफल भएको वेलडाँगी शरणार्थी बस्ती व्यवस्थापन समितिका सचिव सन्चहाङ सुब्बाले बताउनु भयो । सचिव सुब्बाका अनुसार शरणार्थी शिविरमा जेनजी आन्दोलन पछि शरणार्थी शिविरमा रहेको शसस्त्र प्रहरीको सुरक्षा बेश खाली भएकाले शरणार्थी बस्ती भित्र सुरक्षा चुनौति समेत बढेको छ । तेस्रो मुलुक पुगेका विभिन्न विकसित ८ वटा मुलुकबाट आफन्त भेट्न आएकाहरुको सामान समेत चोरीका घटना हुन थालेका छन् । यस्तै बस्ती भित्र दुव्यर्सन प्रयोग कर्ता समेत बढ्दै गएको उहाँले बताउनु भयो ।
शरणार्थी शिविरका संघ संस्थाका अगुवासँगको छलफलमा शरणार्थीले सुरक्षा चुनौति, घटना दर्ता तथा परिचय पत्र नविकरण जस्ता कार्य नहुँदा उच्च शिक्षा लिने शरणार्थीहरुले विधालय छाड्नु पर्ने अवस्था आएको बताएका छन् ।
शरणार्थीको समस्या र मागबारे राजदुत लोरेन्जोले भुटानसँग पटक पटक शरणार्थीलाई फिर्ती गराउने विषयमा आफूहरुले कुरा राखेको बताउनु भयो । तर भुटानले सकरात्मक उत्तर नदिएकाले शरणार्थीलाई निराश नभई आफ्ना मागहरु पुरा गर्न माग गर्ने कुरामा जोड दिने कार्यलाई जारी राख्न समेत आग्रह गर्नु भयो ।
यस्तै दिर्घकालिन रुपमा समस्या समाधान गर्न भूटान स्वतन्त्र जनमंच, भूटान राष्ट्रिय पर्नमिलन समिति, अपाङ संघ, बाल मंच लगायतले स्वदेश फिर्ती, स्थानीयकरण या पूर्नवासको ढोका खुल्ला गरी समस्या समाधान गर्न मौखिक तथा ज्ञापन पत्र मार्फत माग गरेका छन् ।
जनमंचका प्रतिनिधि कविराज मगरले मानव अधिकारको रक्षामा खटिएको सँयुक्त राष्ट्र संघीय निकायले आफूहरुको घर फिर्ती अधिकारलाई खासै चासो नदिएकाले यसलाई कडाईका साथ पहल गर्न माग गर्नु भयो ।
टोलीमा राजदुत सहित सँयुक्त राष्ट्र संघीय उच्च आयोगकी नेपाल प्रतिनिधि मोनिक सोखान, विश्व लुथरन फेडेरेशन लगायतका दातृ निकायका प्रतिधिनिहरुको उपस्थिति रहेको थियो ।