प्रधानमन्त्री दाहाललाई आज तेस्राे पटक विश्वासकाे मत प्राप्त
३० फाल्गुण २०८०,काठमाडौँ– प्रधानमन्त्री पुष्प कमल दाहालले आज विश्वासकाे मत प्राप्त गर्नु भएकाे छ । २०७९ को निर्वाचनबाट गठित प्रतिनिधि सभाको यो कार्यकालको १४ महिनाको अवधिमा उहाँले याे तेस्राे पटक विश्वासको मत लिनु भएको छ । तेस्रो पटक प्रधानमन्त्री दाहालले विश्वासको मत लिँदा प्रधानमन्त्रीको पक्षमा १ सय ५७ जना सांसदले मत हालेका छन् । विपक्षमा १ सय १० मत परेको छ । २७५ सदस्यीय प्रतिनिधि सभामा बहुमत प्राप्त गर्न १ सय ३८ संख्या आवश्यक पर्दछ ।
प्रधामन्त्री प्रचण्डले पहिलो पटक विश्वासमो मत लिदाँ मतदानमा सहभागी २ सय ७० सांसदमध्ये २ सय ६८ जनाले मत दिनु भएको थियो । राष्ट्रिय जनमोर्चाका चित्रबहादुर केसी र नेपाल मजदुर किसान पार्टीका प्रेम सुवालले भने विपक्षमा मतदान गरेका थिए । यस्तै दाेस्राे पटक विश्वासको मत लिँदा १ सय ७२ मत प्राप्त भएकाे थियाे भने विपक्षमा ८९ मत खसेको थियो ।
विश्वासको मत लिएसँगै सञ्चारकर्मीहरुसँग कुराकानी गर्दै प्रधानमन्त्री दाहालले आफ्नो जिम्मेवारी बढेको बताउनु भएको छ । उहाँले अव आफू थप जिम्मेवार भएर काम गर्ने बताउनु भयाे । प्रधानमन्त्री प्रचण्डले राष्ट्र र जनताको पक्षमा राम्रो काम तीव्र गतिमा पूरा गर्ने आफ्नो जिम्मेवारी काँधमा थपिएको उल्लेख गर्दै संयमित वातावरणमा लोकतान्त्रिक ढंगले विश्वासको मत प्राप्त गरेको प्रतिक्रिया दिनु भयो ।
