१२ लाखको सुपारी सहित चालक र गाडी नियन्त्रणमा
१८ जेष्ठ २०८१, झापा
झापाको मेचिनगर नगरपालिका भारतीय सिमावर्ती क्षेत्रमा १२ लाख मुल्य बराबरको सुपारी नियन्त्रणमा लिइएको छ । मेचिनगर नगरपालिका वडा नं. ६ भट्टराई चौक नजिक राजश्व छलि ओसार पसार भइरहेको भन्ने गोप्य सूचनाको आधारमा प्रहरीले नियन्त्रणमा लिएको हो ।
प्रदेश १–०१–००१ च ७१२५ नम्बरको वोलेरो गाडी सहित चालक बुद्धशान्ति गाउँपालिका वडा नं. ३ का युवराज उप्रेतीलाई नियन्त्रणमा लिइएको जिल्ला प्रहरी कार्यालय झापाले जनाएको छ । गाडीमा ३३ वटा बोरामा उसिनेर सुकाएको लाली सुपारी २ हजार ३ सय ७८ केजी रहेको प्रहरीले जनाएको छ । नियन्त्रणमा लिइएको गाडी चालक र सुपारी राजश्व अनुसन्धान कार्यालय इटहरी पठाइएको बताइएको छ ।
