१७ चैत्र २०७७, सिरहा– गएकाे चैत्र १ गते सिरहाको लहानस्थित मालपोत कार्यालयमा बम विष्फोट गराएको आरोपमा आज सिरहा प्रहरीले दुई जनालाई पक्राउ गरेको छ ।

पक्राउ पर्नेमा सिरहाको सुखिपुर नगरपालिका–५ निवासी २५ वर्षीय रामरिझन यादव र लक्ष्मीपुर निवासी २६ वर्षीय अभिमन्यू गिरी रहेका छन् । गत चैत १ गते मालपोत कार्यालयको पहिलो तल्लामा भएको बम विष्फोटमा एक कर्मचारीसहित आठ घाइते भएका थिए ।

प्रेसर कुकर बम विष्फोट हुँदा कार्यालयमा क्षति पुगेको थियो । बम विस्फोटको जिम्मा घटनाकै दिन तराई जनतान्त्रिक मुक्तिमोर्चा गोइत समूहले लिएको थियो । यसअघि सोही बम विस्फोटमा संलग्न रहेको आरोपमा सशस्त्र प्रहरीले लहान नगरपालिका–१८ भदैया निवासी २८ वर्षीय बलराम मण्डललाई पनि पक्राउ गरेको थियो । घटनाबारे अझै छानविन भइरहेकाे प्रहरी स्राेतले जानकारी दिएकाे छ ।