प्रदेश एक पालिका स्तरीय दाेस्राे अध्यक्ष झापा भलिवल कपमा आमचोक, भद्रपुर र झापा विजयी (फाेटाे फिचर सहित)
७ पौष २०७८/सारासन्देश समाचार
झापाको झापा गाउँपालिका वडा नं. ६ शरणामतीमा जारी प्रदेश नम्बर एक पालिका स्तरीय दोश्रो अध्यक्ष कप भलिबल प्रतियोगिताको आज ६ वटा टीमबीच खेल सम्पन्न भएको छ । खेलमा आमचोक, भद्रपुर र झापा गाउँपालिका विजयी भएका छन् । आमचौकले अर्जुनधारा, भद्रपुरले टेम्के मैयुङ भोजपुर र आयोजक झापाले चुलाचुली इलामलाई हराएको छ ।
आमचोकले पहिलो खेलमा झापाको अर्जुनधारा नगरपालिकालाई २५–१७,२५–१३ र २५–१५ ले पराजित गरेको हो । त्यस्तै दोश्रो खेलमा भद्रपुर नगरपालिकाले टेम्के मैयुङ्ग गाउँपालिका भोजपुर लाई २५–१७, २५–१७ र २५–२० को सोझो सेटमा पराजित गरेको थियो । त्यस्तै आजै सम्पन्न अन्तिम खेलमा आयोजक झापा गाउँपालिकाले इलामको चुलाचुली गाउँपालिकालाई २५–१३, २५–२० र २५–२१ को सोझो सेटमा पराजित गरेको थियो ।
भोलि दमक र षडानन्द भोजपुर, विर्तामोड र भद्रपुर तथा आमचौक र कमल गाउँपालिकाबीच प्रतिस्पर्धा हुने छ । प्रतियोगिताको विजेताले नगद एक लाख एकाउन्न हजार तथा उप–विजेताले नगद एक लाख हात पार्नेछन् ।
जनता माविको खेल मैदानमा भइरहेको खेल प्रतियोगिताको आयोजना झापा गाउँपालिकाले गरेको हो । प्रतियोगितामा एक नम्बर प्रदेशका ५ वटा जिल्लाको १६ टिमले भाग लिएका छन् । खेल आगामी १० गतेसम्म हुने आयोजकले जानकारी दिएको छ ।
