झापा गाेल्डकपमा संकटा क्वार्टर फाइनलमा प्रवेश

२२ फाल्गुण २०७८, सारासन्देश समाचार– झापाको विर्तामोड स्थित डोमालाल राजबंशी रंगशालामा जारी पाँचौँ संस्करणको झापा गोल्ड कपको दोस्रो दिनको खेलमा संकटा क्लब काठमाडौँ क्वार्टर फाइनलमा प्रवेश गरेको छ । नेपाल पुलिस क्लबलाई शून्यको विरुद्ध १ गोल गर्दै संकटाले क्वार्टर फाइनलको यात्रा तय गरेको हो ।
खेलमा संकटाका उत्तम राईले ६५औँ मिनेटमा गरेको गोल नै निर्णायक बन्न पुग्याे । उनले फोडे फोफोनाको क्रसलाई हेडमार्फत गोलमा परिणत गरेका छन् । आज भएको खेलको प्लेयर अफ द म्याच विजेता टिम संकटाका फोडे फोफोना घोषित भएका छन् । उनले नगद ९ हजार ९९९ रुपैयाँ प्राप्त गरेका छन् ।

फागुन ३० गतेसम्म चल्ने प्रतियोगिताको विजेताले नगद १२ लाख ५५ हजार पाउनेछ भने उपविजेताले ६ लाख पाँच हजार प्राप्त गर्नेछन् । प्रतियोगिताको सर्वोत्कृष्ट खेलाडीले मोटरसाइकल पाउनेछन् । उत्कृष्ट मिडफिल्डर, डिफेन्डर, स्ट्राइकररले नगद २१ हजार प्राप्त गर्नेछन् । प्रतियोगितामा सर्वाधिक गोलकर्ताले नगद २५ हजार पाउनेछ । भोलि सोमबारको क्वार्टर फाइनल खेल सशस्त्र प्रहरीको एपीएफ क्लब र सातदोबाटो युथ क्लबबीच हुने आयोजकले जानकारी दिएको छ ।