पाचौं संस्करण झापा गोल्ड कपः त्रिभूवन आर्मी सेमी फाइनलमा प्रवेश

२५ फाल्गुण २०७८/झापा– झापामा जारी ५ औं संस्करणको झापा गोल्ड कपको आज भएको खेलमा त्रिभुवन आर्मी फुटबल क्लबसेमिफाइनलमा प्रवेश गरेको छ । खेलमा भारत दार्जिलिङको एम एफसीलाई शून्यको विरुद्ध ३ गोल गर्दै आर्मी सेमिफाइनलमा प्रवेश गरेको हो ।  आर्मीका लागि सन्तोष तामाङ, जर्ज प्रिन्स कार्की र विकास तामाङले एक÷एक गोल गरे । खेलको १० औँ मिनेटमा सन्तोष तामाङको प्रहार गोलमा परिणत भयो । त्यस्तै, ३५ औँ मिनेटमा कप्तान जर्ज प्रिन्स कार्कीले गोल थपेका छन् । त्यसैगरी, खेलको ६८ औँ मिनेटमा आर्मीका विकास तामाङ अर्को गोल थपेर जित सुनिश्चित गरेका छन् ।

आज भएको खेलको प्लेयर अफ दि म्याच आर्मीका सन्तोष तामाङ घोषित भएका छन् । उनले नगद ९ हजार ९९९ रुपैयाँ पाएका छन् । भोलि विहीबारको खेल घरेलु टोली झापा–११ फुटबल क्लब र भारत सिक्किमको आरपी एफसीबीच हुने आयोजकले जनाएको छ ।

फागुन ३० गतेसम्म चल्ने प्रतियोगिताका विजेताले नगद १२ लाख ५५ हजार र उपविजेताले ६ लाख ५ हजार पाउने आयोजकले जनाएको छ । प्रतियोगिताको सर्वोत्कृष्ट खेलाडीले मोटरसाइकल पाउनेछ । सर्वाधिक गोलकर्ताले नगद २५ हजार पाउनेछ । उत्कृष्ट मिडफिल्डर, उत्कृष्ट गोलरक्षक, उत्कृष्ट डफेन्डरले नगद २१ हजार प्राप्त गर्ने आयोजकले जनाएको छ ।