झापामा जारी फुटवल प्रतियाेगितामा घरेलु झापा ११ सेमिफाइनलमा प्रवेश

२६ फाल्गुण २०७८,झापा–झापको विर्तामोड डोमालाल राजवंशी रङ्गशालामा जारी पाँचौँ झापा गोल्ड कपको आज भएको खेलमा घरेलु टोली झापा¬–११ फुटबल क्लब सेमिफाइनलमा प्रवेश गरेको छ ।
आज भएको अन्तिम क्वार्टर फाइनलमा पाहुना टोली सिक्किमको रेडपान्डा फुटबल क्लबलाई ५–१ को गोल अन्तरले पराजित गर्दै झापा ११ सेमिफाइनलमा प्रवेश गरेको हो । झापा–११ का लागि विमल घर्ती मगर, विशाल राई बी, विश्वास श्रेष्ठले गोल गरेका छन् । यस्तै रेडपाण्डाको तर्फबाट ६६ औँ मिनेटमा पेनाल्टी मार्फत योगेश मगरले गोल गरेका छन् । झापाका विशाल बस्नेतले सिक्किमका अमन रसाइलीलाई डिएरियामा फाउल गरे पछि रेडपाण्डाले पेनाल्टी पाएको थियो ।

आज भएको खेलको प्लेयर अफ दि म्याच विजयी टोली झापाका विश्वास श्रेष्ठ भएका छन् । श्रेष्ठले नगद ९ हजार ९९९ रुपैयाँ पाएका छन् ।
भोलि शुक्रबारको पहिलो सेमिफाइनल खेल त्रिभुवन आर्मी फुटबल क्लब र सातदोबाटो युथ क्लबबीच हुने आयोजक समितिले जानकारी दिएको छ ।