सर्पले डसेर दमकमा बालिकाकाे मृत्यु

२० असाेज २०७९, झापा – टीका थाप्न मावल गएकी झापाकी एक बालिकाको सर्पको डसाइबाट मृत्यु भएको छ । गोमन सर्पले डस्दा दमक नगरपालिका- २ की ८ वर्षीया श्रुति सापकोटाको मृत्यु भएको जिल्ला प्रहरी कार्यालय झापाले जनाएको छ ।

श्रुति बुधबार गौरादह नगरपालिका- ९ स्थित बैगुन्धुरा मावलमा दसैंको टिका लगाउन जानु भएकाे थियाे । कोठाको भुइँमा ओछ्यान लगाएर सुतेको बेला राति साढे एक बजेतिर श्रुतिलाई गोमन सर्पले डसेको पारिवारिक श्रोतलाई उद्धृत गर्दै प्रहरीले जनाएको छ ।
श्रुतिलाई उपचारका लागि दमकस्थित लाइफलाइन अस्पताल लगिएको तर चिकित्सकले तत्काल मृत घोषणा गरेका छन् । झापामा दुई महिनाभित्र सर्पले डसेर तीन जनाको मृत्यु भएको छ । जिल्लामा बर्षेनी १ हजार देखि १ हजार ५ सय जनासम्मले सर्पले डसेर उपचार गर्ने गरेकाे सर्प दंश उपचार केन्द्रहरूकाे तथ्याङ्क छ । हाल झापामा ४ वटा सर्प दंश उपचार केन्द्रहरू संचालनमा रहेका छन् ।