आज देखि नेपालमा फ्रन्ट लाइनमा खटिनेहरूमा काेराेना विरूध्द खाेप लगाउन शुरू
१४ माघ २०७७, काठमाडौं– नेपालमा कोरोना भाइरस संक्रमण सुरु भएको एक वर्षपछि खोप अभियान सुरु भएको छ ।
प्रधानमन्त्री केपी शर्मा ओलीले बुधबार भर्चुअल माध्यमबाट खोप अभियान शुभारम्भ गर्नुभएको छ । उहाँले कोरोना भाइरसविरुद्धको खोप यथाशीघ्र सबै नेपालीलाई निःशुल्क उपलब्ध गराउने प्रतिबद्धता व्यक्त गर्नुभएको छ । प्रधानमन्त्री ओलीले नेपालमा सुरु भएको खोप अभियान कोरोना महामारीविरुद्ध लड्ने महत्वपूर्ण माध्यम भएको बताउनुभयो । उहाँले खोप नाफा कमाउने माध्यम बनाउन नहुने बताउँदै महामारी नियन्त्रण विश्वकै चुनौती रहेको उल्लेख गर्नुभयो ।
पहिलो चरणमा करिब चारलाख तीस हजार व्यक्तिहरुलाई खोप लगाउने तयारी सरकारले गरेको छ, जसमा खोपको पहिलो मात्रा करिब सात देखि दश दिनमा दिइसक्ने लक्ष्य सरकारको छ । पहिलो मात्रा दिएको चार सातामा दोस्रो मात्रा दिइने छ । पहिलो चरणका लागि आएको जम्मा दशलाख खोप मध्ये लक्षित वर्गको संख्याका आधारमा सबैभन्दा बढी बागमती प्रदेशका लागि खोप छुट्याइएको स्वास्थ्य तथा जनसंख्या मन्त्रालयले जनाएको छ ।
लक्षित समूहले मात्र खोप पाएको यकिन गर्नका लागि सम्बन्धित संस्थाले खोप पाउने व्यक्तिको सूची सार्वजनिक गर्ने व्यवस्था पनि सरकारले गरेको छ । खोप केन्द्र रहेको संस्था र स्वास्थ्य कार्यालयका प्रमुखले सूची सार्वजनिक गर्नुपर्ने हुन्छ । साथै खोप लगाउने व्यक्तिलाई परिचय पत्र दिने व्यवस्था गरिएको छ। त्यही परिचय पत्रको आधारमा मन्त्रालयले खोपको दोस्रो मात्रा सम्बन्धित व्यक्तिलाई दिने छ ।
एक नम्बर प्रदेशमा झापामा उत्साहजनक खाेपः ५३५ जनाले लगाए खाेप
यस्तै यता प्रम ओलीकाे गृह जिल्ला झापामा ५ सय ३५ जनाले खाेप लगाएका छन् । ३ सय १७ महिला र २ सय १८ पुरूषले जिल्लाका ३ वटा केन्द्रबाट खाेप लगाएका छन् । यस्तै माेरङमा १४७, सुनसरी २०, धनकुटा ९१, उदयपुर ३३, भाेजपुर १२८, तेह्रथुम ५०, इलाम १४६ गरी प्रदेशका ८ जिल्लामा अाज १ हजार १ सय ५० जनाले खाेप लगाएका छन् । बाँकी ६ वटा जिल्लामा भाेलि र पर्सी देखि खाेप लगाइने प्रदेश नम्बर एक काेभिडसम्बन्धि जनस्वास्थ्य अधिकृत अाेमकुमारी राजवंशीले बताउनु भयाे ।
गतवर्ष माघ १० गते पहिलोपटक देखापरेको कोरोनाले हालसम्म २ लाख ७० हजार संक्रमित भएका छन् भने २ लाख ६६ को हाराहारीमा संक्रमण मुक्त भएका छन् । यसबाट हालसम्म २ हजार १ सयको निधन भएको छ ।
