दशैैं तिहार अवधिमा झापामा १४ स्थानमा आगलागीः एक जनाको मृत्यु
३० कार्तिक २०८०/सारासन्देश समाचार
झापा जिल्लामा दशैं तिहार अवधिभर १४ स्थानमा आगलागीका घटना भएका छन् । आगलागीबाट एक जनाको बृद्धाको ज्यान समेत गएको छ भने केही घाइते भएका छन् । यस्तै आगलागीबाट आधा दर्जन पशु चौपाया जलेर मरेका छन् । अर्जुनधारा नगरपालिका वडा नं. १० की ७५ बर्षी दिलकुमारी राईको जलेर घटना स्थलमै मृत्यु भएको हो ।
जिल्ला प्रहरी कार्यालय झापाले दिएको जानकारी अनुसार सवैभन्दा धेरै आगलागी दमक र विर्तामोड नगरपालिका भएका छन् । तिहारमा खासगरी विजुलीको प्रयोग अधिक हुने भएकाले पनि आगलागीका घटना अधिक भएको पाइएको छ । जिल्लामा आगलागीबाट झण्डै एक करोड बराबरको धनमाल जलेर नष्ट भएको जिल्ला प्रहरी कार्यालय झापाले जनाएको छ ।
अधिकांश आगलागीका घटना विधुत सर्ट र ग्याँसका कारण भएकाले यस तर्फ सचेत हुन प्रहरी कार्यालयले सूचना समेत जारी गरेको छ ।
