पर्सामा साढे २२ केजी अवैध सुन बरामद
२० कराेडकाे सुन बरामद
१ कातिर्क २०७७ वीरगन्ज– पर्साकाे विरगंजकाे रेशम काेठीबाट जिल्ला प्रहरी कार्यालय पर्साले साढे २२ किलो अवैध सुन बरामद गरेको छ ।
झण्डै २० करोड रुपैयाँ बराबरको अवैध सुन श्री गणेश अपार्टमेन्टबाट बरामद गरिएको जिल्ला प्रहरी कार्यालय पर्साले जानकारी दिएकाे छ । वीरगन्ज रेशम कोठीस्थित श्री गणेश अपार्टमेन्टमा छापा मारी प्रहरीले २२ किलो ५ सय ७६ ग्राम सुन नियन्त्रणमा लिएको बताइएकाे छ ।
बरामद सुनसँगै २ केजी ६ सय ८१ ग्राम चाँदीका गरगहना समेत रहेको छ । विशेष सूचनाको आधारमा जिल्ला प्रहरी पर्साका प्रहरी उपरीक्षक गंगा पन्तको कमाण्डमा गएको टोलीले सुन बरामद गरिएको प्रहरी उपरीक्षक गंगा पन्तले जानकारी दिनुभयो ।
सुन धनी को हो भने कुरा अहिलेसम्म थाहा नभएको प्रहरीले जनाएको छ । सुनबारे थप अनुसन्धान भइरहेको पनि जिल्ला प्रहरी कार्यालय पर्साले जानकारी दिएकाे छ ।
